दाक्सु मिडिया
सिरहा, मधेस प्रदेश – औरही गाउँपालिकाले किसानलाई गुणस्तरीय गहुँको बीउ ५० प्रतिशत अनुदानमा वितरण गर्न थालेको छ। समयमै भरोसायोग्य बीउ पाउँदा किसानहरू उत्साहित देखिएका छन्।
मधेस प्रदेशमा गहुँको मुख्य बाली मध्यपुसभित्र रोप्नु पर्ने भएकाले, बीउ नपाउँदा किसान हरेक वर्ष समस्यामा पर्थे। यस वर्ष गाउँपालिकाले ‘गौतम’ र ‘विजय’ जातको गहुँको बीउ ५० प्रतिशत छुटमा उपलब्ध गराएपछि किसानलाई सहजता भएको छ।
औरही–१ का किसान जयकिशोर यादवले भने, “बीउ पाएपछि खेत जोत्ने र अन्य तयारी गर्न सजिलो भएको छ।” गाउँपालिकाका अध्यक्ष शिवजी यादवका अनुसार, किसानको उत्पादन बढाउन र आधुनिक कृषि प्रविधि प्रयोगमा प्रोत्साहन गर्न गाउँपालिकाले दुई वर्षदेखि बालीको मुख्य समयमा बीउ, मल र कृषि उपकरण सहुलियतमा उपलब्ध गराउँदै आएको छ।
गाउँपालिका कृषि शाखाले जनाएको छ कि यस वर्ष १४४४ किसानलाई गहुँको बीउ वितरण गर्ने लक्ष्य राखिएको छ। प्रति किसान २० किलोको दरले वितरण भइरहेकामा, बजार मूल्य रु ७४ प्रति किलो भएपनि किसानले ५० प्रतिशत छुटमा बीउ पाउँदै छन्। हालसम्म करिब एक हजार किसानले बीउ पाइसकेका छन् र वितरण पुस महिनाको पहिलो साताभरि जारी रहनेछ।
तपाईको प्रतिक्रिया दिनुहोस्