पूर्णबहादुर खड्काद्धारा सभापति थापासँग भएको भेटबारे भेलामा ब्रिफिङ

काठमाण्डौँ । नेपाली कांग्रेसका निवर्तमान कार्यवाहक सभापति पूर्णबहादुर खड्काले सभापति गगन थापासँग भएको भेटको कुराकानीबारे आफ्नो समूहका नेतालाई ब्रिफिङ गरेका छन् ।

मंगलबार महाराजगञ्जको स्मार्ट होटलमा भएको निवर्तमान सभापति शेरबहादुर देउवा समूहको भेलामा खड्काले सभापति थापासँगको भेटबारे ब्रिफिङ गरेका हुन् ।

उनले सभापति थापाले पार्टीलाई कसरी एकताबद्ध गरेर लैजानेभन्नेबारे सभापतिले सुझाव मागेको र त्यसबारे आफूले सुझाएका विषयबारे पनि नेताहरूलाई जानकारी गराएका छन् ।

खड्काले पार्टीभित्रको गुटबन्दी अन्त्य गरी पूर्ण एकता कायम गर्न आफू तयार रहेको बताएको पनि जानकारी गराए ।

• 

खड्काले पार्टी एकतालाई देशको राष्ट्रियतासँग जोड्दै वर्तमान समयमा राष्ट्रियता इतिहासमै सबैभन्दा बढी खतरामा रहेको दाबी गरे । बलियो र एकीकृत कांग्रेसले मात्र वर्तमान सरकार र अन्य दलहरूसँग उच्च नैतिक मनोबलका साथ वार्ता गरी संविधानको रक्षा र राष्ट्रिय एकता कायम गर्न सक्ने धारणा आफूले सभापतिसँगको भेटमा राखेको खड्काले बताए।

‘मैले उहाँलाई प्रष्ट भनेको छु— पार्टी एकता टुक्रा–टुक्रामा गरेर अर्थ छैन, यो सम्पूर्ण रूपमा हुनुपर्छ। एकता कसरी गर्ने भन्ने बल अब तपाईंहरूको कोर्टमा छ। तपाईंहरूले एकताको ठोस रोडम्याप र प्रस्ताव तयार पार्नुहोस्, त्यसपछि मात्रै थप छलफल गर्न सकिन्छ।’

जवाफमा सभापति थापाले आफूले उपसभापति विश्वप्रकाश शर्मासँग सल्लाह गरी दुई–तीन दिनभित्र भेट्ने वातावरण बनाउने बताएको जानकारी पनि दिए ।

खड्काले आफ्नो तर्फबाट एकताका लागि कुनै पूर्वशर्त नराखेको र पहिला अर्को पक्षको स्पष्ट धारणा आओस् भन्ने चाहेको पनि बताए ।

सभापति थापाले वैशाख ६ गते गोल्फूटारस्थित निवासमा पुगेर खड्कालाई भेटेका थिए ।