काठमाण्डौँ । मंगलबार नेप्से परिसूचक सामान्य अंकले घटेको छ । नेप्से ३.४४ अंकले घटेर २६६६.६१ विन्दुमा बन्द भएको छ ।
यसदिन कारोबार रकममा पनि गिरावट आएको छ । सोमबार पाँच अर्ब ६५ करोडको सेयर कारोबार भएकोमा मंगलबार पाँच अर्ब ३० करोडको कारोबार भएको छ ।
यो रकम अघिल्लो दिनको तुलनामा ३५ करोड रूपैयाँ कमी आएको हो । आज ३२१ वटा धितोपत्रको एक करोड ६ लाख ४३ हजार ४६९ कित्ता सेयर किनबेच भएको हो ।
मंगलबार १२१ कम्पनीको सेयर मूल्य बढेको छ भने १२३ वटाको घटेको छ।
यसदिन तीन कम्पनीको सेयर मूल्यमा सकारात्मक सर्किट लागेको छ ।
बेटलर्स नेपाल (बालाजु) र विन नेपाल लघुवित्तको मूल्य १० प्रतिशतका दरले बढेको छ भने नेपाल माइक्रो इन्स्योरेन्सको मूल्य ९.९९ प्रतिशत बढेको हो ।
मंगलबार बाराही हाइड्रोपावर पावरको मूल्य सर्वाधिक ५.८५ प्रतिशतले घटेर प्रति कित्ता मूल्य एक हजार ४७ रूपैयाँ ६६ पैसामा झरेको छ ।
यस्तै, सामुदायिक लघुवित्तको मूल्य ४.६२ प्रतिशतले घटेर प्रति कित्ता मूल्य एक हजार ८४२ रूपैयाँ ४२ पैसा कायम भएको छ ।
मंगलबार एनआरएन इन्फ्रास्टक्चरको सर्वाधिक कारोबार भएको छ ।
कम्पनीको प्रतिकित्ता एक हजार ६७८ रूपैयाँमा ५९ करोड १४ लाख रूपैयाँको सेयर कारोबार भएको छ।
यो मूल्य अघिल्लो दिनको तुलनामा २.८७ प्रतिशत घटेको हो ।
सर्वाधिक सेयर खरिद–बिक्री हुने दोस्रो कम्पनीमा हिमायलन रिइन्स्योरेन्स रहेको छ। उक्त कम्पनीको प्रतिकित्ता एक हजार ३८ रूपैयाँमा ४० करोड ६५ लाख बराबरको सेयर कारोबार भएको छ ।
आज कारोबारमा आएका १३ वटा समूहगत परिसूचकमध्ये ६ समूहको परिसूचक बढेको छ भने बाँकी सात समूहको परिसूचक घटेको छ ।
फेसबुकबाट तपाईको प्रतिक्रिया