पाकिस्तानभित्र आईएस लक्ष्यमा अफगान वायुसेनाको कारबाही दाबी

काठमाडौं । अफगानिस्तानको तालिबान नेतृत्वको रक्षा मन्त्रालयले पाकिस्तानका केही सीमावर्ती क्षेत्रमा आईएस–खोरासान (आईएसकेपी) सम्बन्धित ठानिएका ठेगानाहरूमा हवाई आक्रमण गरिएको जनाएको छ।

मन्त्रालयका अनुसार बलुचिस्तानको गुलिस्तान र शकरब क्षेत्र तथा खैबर पख्तुनख्वाको ओराकजाई जिल्लामा रहेका लक्ष्यहरूलाई निशाना बनाइएको हो। ती स्थानहरू अफगानिस्तानविरुद्ध आक्रमणको योजना बनाउन प्रयोग हुँदै आएको दाबी पनि गरिएको छ।

• 

तालिबान प्रशासनले उक्त कारबाहीमा आईएसकेपीका केही महत्वपूर्ण सदस्य मारिएको दाबी गरेको छ। अफगान पक्षले आफ्नो सुरक्षा र स्थायित्वमा खतरा पुर्‍याउने गतिविधिविरुद्ध कडा कदम चाल्ने चेतावनी समेत दिएको छ।

यद्यपि, घटनाबारे पाकिस्तान सरकारको आधिकारिक प्रतिक्रिया सार्वजनिक भइसकेको छैन।