पूर्व प्रधानमन्त्री केपी शर्मा ओली र पूर्व गृहमन्त्री रमेश लेखक ५ दिन हिरासतमा, गोलीकाण्ड प्रकरणमा अनुसन्धान तीव्र

काठमाण्डौँ । काठमाडौँ जिल्ला अदालतले पूर्व प्रधानमन्त्री केपी शर्मा ओली र पूर्व गृहमन्त्री रमेश लेखकलाई ५ दिन हिरासतमा राखेर अनुसन्धान गर्न अनुमति दिएको छ। अदालतका न्यायाधीश आनन्द श्रेष्ठको इजलासले प्रहरीलाई उनीहरूमाथि थप अनुसन्धान अघि बढाउन हिरासत अनुमति दिएको हो ।

प्रहरीले चैत १४ गते उनीहरूलाई पक्राउ गरी आइतबार अदालतमा उपस्थित गराएको थियो । उनीहरू विरुद्ध भदौ २३ र २४ मा भएको जेनजी प्रदर्शनका क्रममा दमन गर्दै किशोरहरूमाथि घातक हतियार प्रयोग गरी गोली चलाउने आदेश दिएको आरोप छ।

गौरीबहादुर कार्की नेतृत्वको उच्चस्तरीय जाँचबुझ आयोगले ओली र लेखकसहित तत्कालीन केन्द्रीय सुरक्षा समितिका पदाधिकारीहरूलाई फौजदारी मुद्दामा अनुसन्धान गर्न सिफारिस गरेको थियो । सोही सिफारिसका आधारमा प्रहरीले ‘ज्यान सम्बन्धी कसुर’ अन्तर्गत अनुसन्धान अघि बढाएको छ।

• 

• 

• 

मन्त्रिपरिषद्को निर्णयअनुसार आयोगको प्रतिवेदन कार्यान्वयनका लागि प्रहरीमा पठाइएको हो। जिल्ला प्रहरी परिसर काठमाडौँका एसएसपी रमेश थापा ले प्रतिवेदन कार्यान्वयन प्रक्रियामा रहेको जानकारी दिएका छन् ।

यद्यपि आयोगले केन्द्रीय सुरक्षा समितिका सबै पदाधिकारीमाथि मुद्दा चलाउन सिफारिस गरे पनि मन्त्रिपरिषद्ले सुरक्षा निकायका अधिकारीहरूको हकमा छुट्टै समिति गठन गरेर थप अध्ययन गर्ने निर्णय गरेको छ ।

उक्त केन्द्रीय सुरक्षा समितिमा प्रहरी महानिरीक्षक, सशस्त्र प्रहरी बलका महानिरीक्षक, गृह मन्त्रालयका सचिव र राष्ट्रिय अनुसन्धान विभागका प्रमुख सदस्य रहने व्यवस्था छ। जेनजी प्रदर्शनका क्रममा ७६ जनाको मृत्यु भएको थियो ।