एसईई परीक्षा जेठ १३ गतेदेखि ,कक्षा १२ को परीक्षा जेठ २६ गते

काठमाडौं – यस वर्षको कक्षा १२ को परीक्षा जेठ २६ गतेदेखि र २०७७ सालको एसईई परीक्षा जेठ १३ गतेदेखि हुने भएको छ । राष्ट्रिय परीक्षा बोर्डको मंगलबार बसेको बैठकले कक्षा १२ को परीक्षा जेठ २६ गतेदेखि गर्ने निर्णय गरेको बोर्डका अध्यक्ष प्रा.डा.चन्द्रमणि पौडेलले बताए ।
परीक्षा जेठ २६ देखि असार ४ गतेसम्म हुनेछ । कोभिड–१९ महामारीका कारण सरकारले यो वर्षको शैक्षिक सत्र दुई महिना पछाडि धकेलेर जेठ मसान्तसम्म र नयाँ शैक्षिक सत्र असारदेखि सुरु गर्ने निर्णय गरिसकेको छ ।
यसअघि वैशाखदेखि चैतसम्म शैक्षिक सत्र सञ्चालन हुने गरेको थियो । मन्त्रिपरिषदको बैठकले शिक्षा नियमावली संशोधन गरेर दुई महिना शैक्षिक सत्र थप गर्ने अधिकार मन्त्रालयलाई दिएको थियो ।
यस्तै २०७७ सालको माध्यमिक शिक्षा परीक्षा अर्थात् एसईई परीक्षा आगामी जेठ १३ देखि सञ्चालन हुने भएको छ ।
जेठ १३ देखि २४ गतेसम्म परीक्षा सञ्चालन गर्ने निर्णय गरेको राष्ट्रिय परीक्षा बोर्डले जनाएको हो । कोरोनाका कारण चैतमै लिनुपर्ने परीक्षा दुई महिना ढिला गरी हुनलागेको हो ।
यो वर्ष बोर्डले नै परीक्षा लिनेछ । मंगलबार बसेको बोर्ड बैठकले एसईई परीक्षासम्बन्धी निर्णय गरेको हो ।